Harmony Of The Seas

أشهر وأكبر سفن الكروز التابعة لأسطول بواخر رويال كاريبيان

أول رحلة بحرية رسميه لها كانت في مايو ٢٠١٦

مرافق السفينة

سبا ونادي رياضي

٤ حمامات سباحة

١٠ أحواض استحمام ساخنة اثنان منهم على سطح السفينة

زحلاقية على طول ارتفاع السفينة

حوضين تزحلق على أمواج المياه على سطح السفينه

٢٠ مكان مخصص لتناول الطعام

حلبة الجليد

المسرح الملكي يضم أكثر من ١٤٠٠ مقعد

المسرح المائي في الهواء الطلق

جدار تسلق الصخور

ملعب كرة سلة

ملعب غولف مصغر وطاولات كرة طاولة

الزيب لاين : التعلق بالحبل والانتقال من جهة لأقصى الجهة الاخر على طول ارتفاع السفينه

محلات تجارية : ملابس – صيدلية – هدايا

ممشى على طول محيط السفينة

حديقة

تجربتي الشخصية

رحلتنا بدت من مرفأ برشلونة في أسبانيا كنا واصلين قبلها بجم يوم ، الرحلة في هارموني أوف ذا سيز كانت عبارة عن ٧ أيام بدت من برشلونه أول يوم وثاني يوم صحينا الصبح لقينا نفسنا في جزيرة بالما دي ما يوركا واليوم اللي بعده فرنسا وتحديداً مرسيليا بعدها ايطاليا لمدة ثلاث آيام ، يوم في فلورنس ويوم في روما ويوم في نابلس ، واخر يوم بالرحلة كان كله بالبحر لغاية ما وصلنا اليوم اللي بعده برشلونه مرة ثانية

كنا شخصين كبار و٣ أطفال

حجزت مبجر قبل الرحلة بمدة طويلة من أواخر شهر ٣ والرحلة كانت بداية شهر ٩ ، بعد انطلاق أول رحلاتها بأربع أشهر فقط يعني صعدنا الباخرة وهي بقراطيسها توا ههههههه ، والسعر كان وايد أرخص مقارنةً باللي احجزوا قبل هالموعد بشهرين

حجزت غرفتين لأن بالغرفة الوحدة أقصى حد ٤ أشخاص من ضمنهم الأطفال

الغرفة الأولى بلكونتها مطلة على البحر والثانيه بلوكونتها مطلة على داخل السفينة

وأنصح بشدة بالمطلة على البحر لأن كل ما تحركت السفينة تغير المنظر وكل مرة المنظر يكون جميل جداً وأهدى بوايد من المطلة على داخل السفينة

حجزت عن طريق الموقع الرسمي

Harmony of the Seas

الحجز ياخذ وقت خصوصاً التفاصيل الدقيقة حتى صوركم راح يطلبون انكم ترفعونها للموقع مع الحجز لكن هالشي وايد راح يسهل عليكم وريحكم لي دخلتوا السفينة راح تختصرون اجراءات طويلة وايد وتدخلون بسرعة وسلاسة وقبل الناس اللي أغلبهم أهملوا هالتفاصيل وقت الحجز

خلال الحجز حددت بالضبط وقت دخولنا للسفينة ووقت طلعتنا منها وكملت كل البيانات المطلوبة بالتفصيل هالشي وايد سرع اجراءات دخولنا للسفينة ، لأن لما توصلون السفينة إذا ماكانت كل البيانات متعبية بالويب سايت أثناء الحجز راح يأخرونكم شوي على ما الموظف يعبي معاكم كل البيانات بالتفصيل . أول ما تركبون السفينة راح تدخلون واهما يوصلون لكم الجناط الغرف ولازم تدرون إن الجناط ما راح تستلمونها إلا بعد ساعتين أقل شي إلى ٦ ساعات تقريباً ، فأفضل إذا عندكم أغراض ضرورية ادخلونهم معاكم بجنطة صغيرة سحب مثلاً . لاحظت إن في ناس كانوا مستغلين هالوقت في السباحة بحمامات السباحة على ما توصل جناطهم فممكن تحسبون حسابكم لهالشي وتجهزون مايوهات العيال ولبسكم بالجنطة الصغيرة اللي بدخلونها باليد معاكم ، لأن هالفترة الأغلبية ناطر جناطة فحمامات السباحة شبه فاضية

من الامور اللي ممنوع تركب السفينة هو الاوتي (مكواة الملابس) وقت التفتيش اذا لقوها بجناطكم راح ياخذونها منكم ، لكن الاوتي البخار مسموح فيه ، التدخين ممنوع منعاً باتاً إلا في مكانين فقط بالسفينة ، الاول داخل السفينه بكبينه خاصة والثاني فوق سطح السفينه مكان مخصص ، واللي يفكر ان بدخن وما راح يدرون عنه لا تفكر تسويها لأن العقاب عندهم إنك تنزل عند أول مرفأ توصل له السفينة

أول ما دخلنا السفينة استلمنا كروت باسم كل واحد فينا حتى الأطفال كل واحد له كرت خاص فيه للغرفة وعليه اسمه ورقم الغرفة ، من خلال هالكروت بعد راح تحجزون أي فعالية أو نشاط داخل أو خارج السفينة ، طبعاً اللي داخل السفينة اغلبهم مجاني ، كروت العيال ما تحسب أي خصم مادي منكم فقط كروت الكبار ، يعني مثلاً كنتوا حاضرين المسرحيه وحبيتوا تشربون شي وقت العرض ممكن فقط تقدم الكرت للويتر وهو راح يدخل بالسستم عندهم انك طلبت هالشغلة وتحاسبها بالنهاية وقت نزولكم من السفينة ، أو انك تدفع كاش والدفع كله بالدولار . نفس الشي بخصوص المشتريات من المحلات والمطاعم الخاصة وانتوا ترى كل غرض تشتريه لازم تدفع عليه الضريبة عند مكتب استعلامات السفينة يعني اللي شرا آي شي كاش لا يعتقد ان بس خلاص  لا  لازم يمر مكتب الاستعلامات عندكم قسم خاص في تسديد الضريبة وعادةً يكون زحمة ، ويكون الوضع لوعة لآخر درجة قبل لا توصل الباخرة بيوم بالليل لآخر وجهة كل الناس يكونون مأجلين هالشي وفي ناس بعد يأجلون أكثر لي لحظة النزول من السفينة وما أنصح بهالشي نهائياً لأن ممكن توقف أقل شي ٣ ساعات أو ٤ ساعات على ما ييك الدور

نصحيتي إن تخلصون مشترياتكم كلها خلال أيام الرحلة ، وتسددون الضريبة مرة وحدة قبل لا تنزلون من السفينة بيوم ويفضل الفترة الصباحية لأن الزحمة تكون وايد أقل

لما دخلنا السفينة كانت فترة الغدا تقريباً فتغدينا في مطعم البيتزا ، أغلب المطاعم مجانية من ضمن قيمة تذكرة الرحلة إلا بعض المطاعم منها المطعم الياباني وجوني روكتس وستاربكس

بلغونا أنهم راح يسوون اخلاء وهمي للسفينة وإجباري كل الركاب اليدد لازم يشاركون ، وقتها ممنوع استخدام المصاعد فنزلنا من الدرج من الدور ١٤ لغاية الدور الارضي وكان التجمع في أحد المطاعم ، اهما راح يبلغونكم على حسب غرفكم وين تتجهين ، لما تجمعنا في المطعم علمونا شنو راح نسوي في حالة حدوث أي طارئ ولبسوا الصغار أساور وقالوا لهم ما تفصخونهم طول مدة الرحلة لأن هالأساور مهمة في حالة ضياع الطفل راح يعرفون منو أهله بسرعة ويردونه لهم

أول ما دخلنا الغرفة لقيناهم حاطين لنا بظرف الرقم السري للانترنت اللي كنت طالبته ورسالة ترحيب بأسماءنا وجدول فعاليات وأنشطة اليوم كله ، الغرفة فيها خزانتين ملابس وثلاجة بدون فريزر وفي بالغرفة فتحات حق شحن التلفونات والاجهزة الذكية ، اهتمامهم بالنظافة وايد حلو ولا مرة شفت شي بالغرفة ضايقني وحتى في كل مرافق السفينة على الرغم من كبر حجم السفينة وأعداد الناس ممكن توصل لي ٦٠٠٠ والطاقم كله عددهم  ٢٠٠٠ ، كنت في كل مرة ادخل الغرفة وأرجع ألقاهم منظفين ومرتبينها عادي نفس اليوم يرتبون لكم الغرفة ٣ مرات بدون ما تطلبون لأنهم مخصصين عامل للتنظيف لعدد معين من الغرف فما عنده شغل غير إنه يحرص على راحتهم ورضاكم بنظافة الغرفة

كل يوم بالغرفة راح تلقونهم حاطين لكم جدول باجر لداخل وخارج السفينة ، جدول داخل السفينة راح تلقون فيه كل مواعيد المطاعم للريوق والغدا والعشا متى يبدون ومتى ينتهون ، وكل الفعاليات من عروض وأنشطة وأماكنهم في السفينة وين والحجز يتم من خلال الايبادات والشاشات الموزعة داخل السفينة بكل مكان ، مجرد انكم تستخدمون الكروت اللي عندكم باللمس وراح يتعرف الايباد او الشاشة على الكرت وتدخلون على كل المعلومات اللي حابين تعرفونها وتحجزون بكل سهولة

العروض داخل السفينة كلها بالمجان أو بالاحرى من ضمن حجزكم ، لكن الرحلات والانشطة اللي خارج السفينة فهي مسعره كل رحلة على حسب ، احنا جربنا نروح رحلات مع قروبات بالسفينة وجربنا بعد نروح بروحنا وفي كلا الحالتين كان الوضع ممتع الحمدلله لأن كنا عارفين وين بنروح وشنو بنسوي واحنا مختارين التفاصيل كلها، نصيحتي هي انكم قبل مدة كافية من الرحلة تقرون عدل عن المكان اللي بتروحون له علشان تشوفون اذا يناسبكم أو لا ، نصيحة ثانيه بعد إذا كنتوا تبون تروحون رحلات مع قروبات السفينة حجزوا مبجر وايد قبل لا تركبون السفينة حتى ، قبلها عادي بشهر تقدرون تحجزون لأن الاماكن محدودة ولمجرد إن القروبات تفول ما راح تلقون لكم مكان ، أكثر مكانين زرناهم وحبيتهم وايد اهما : جزيرة بالما دي مايوركا زرنا فيها ٥ أماكن كلهم كانوا حلوين و فلورنس في ايطاليا روعة المناظر والجو خيااااال كنت أتمنى أقعد فيها أكثر حبيتها وايد، وأكثر مكان ما حبيته وما أنصح بزيارته هي مدينة نابلس في  ايطاليا لأن شوارعها ماكانت نظيفة بالمرة والوضع ماكان أمان وشعبها ماكانوا ودودين يخرعون أشكالهم عصابات

الانترنت بالسفينة متوفر وتدفعون له من البداية وانتو تحجزون تذاكركم للسفينة ، في سرعتين للنت أنا اخترت الأسرع وكان ممتاز تقريباً طلع علي بحدود ٤٥ دينار لشخصين

في يومين بالاسبوع الكابتن ينزل فيهم ويجتمع مع ركاب السفينة وممكن إن الكل يصور معاه ويكلمه ويسولف معاه . كل يوم في جدول جديد وفعاليات في السفينة راح تلقونهم في غرفكم كل ليلة موجودين مع شكل حلو للفوطة 🙂 مرة على فيل ومرة على دب ومرة على سمجه .. الخ الجدول فيه كلللل الفعاليات داخل السفينة وخارجها ، اللي داخل السفينة محددين لكم أماكن الفعاليات وأوقاتها ، واللي خارج السفينة نصيحة لازم تكونون مطلعين عليها من قبل من خلال الموقع الرسمي ورقم حجزكم علشان يمديكم تحجزون معاهم إذا كنتوا حابين . وفي كل يوم في ثيم مختلف ولبس محدد مثلا يوم اللبس التنكري ويوم اللبس الرسمي ويوم لبس الكاجوال .. الخ وناسة العيال وايد استانسوا

السفينة تصلح للمعاريس وأيضاً للعائلات وبعد للشباب ، أنا أشوف انها تناسب الكل ، فيها أماكن مخصصة للعب وتناسب جميع الأعمار والأذواق ، الأكل في المطاعم لذيذ وفي شغلة وايد حبيتها إن في بعض الأطباق اللحم المستخدم حلال ، كل اللي عليكم انكم تسئلون الموظفين في المطعم واهما راح يتأكدون لكم من الشيف ويحدد لكم شنو هي الاطباق اللي مستخدمين فيها لحم حلال للمسلمين ، حتى بالبوفيه سئلوا لأن كل يوم الاصناف تتغير ، ومرات يكون الطبق مأكولات بحرية لكن مطبوخ مع نبيذ . بخصوص البيبسي والماي هالشي عليهم رسوم دايماً عدا بالبوفيه فيوفرون لكم الماي أما طول اليوم راح تضطرون تشترون وللأسف غالي ، فأفضل حل إن في أول رحلة تنزلون من السفينة تشترون لكم كمية وكل مرة تنزلون نفس الشي ترجعون تشترون

من الشغلات اللي لا طوفكم هي المشي في ممشى السفينة شي خيال في مكان مخصص للمشي حول السفينة خصوصاً إذا كانت السفينة تتحرك بنص البحر ، الهوا عجيب والجو روعة هوا نقي ومنعش

بخصوص العروض والمسرحيات كانت روعة حبيتهم وايد وهذا أكثر عرض حبيته لأن أول مرة أحضر عرض بمسرح مائي متحرك مرة يصير ممسرح عادي وفجأة يتغير الوضع

وبقية العروض ما تقل مستواها عنه خصوصاً اللي بالمسرح الداخلي الكبير شي خيال العرض كان

هذا موجز بسيط جداً جداً عن الرحلة ، وكنت متعمدة ما كتبت لكم بالتفصيل كل يوم شنو سوينا ووين رحنا بالضبط ، والسبب إن السفينة انتقلت من أوروبا وحالياً متواجدة في أمريكا وعلى حد علمي قريت إنها راح تبقى هناك ٣ سنوات على الأقل ، فما في فايدة من إني أذكر لكم الاماكن السياحية اللي زرناها 🙂 حجزوا رحلات امريكا واكتشوا بنفسكم الاماكن السياحية اللي تزورها السفينة

اذا عندكم أي استفسار يسعدني أجاوب عن تساؤلاتكم 🙂

مجموعة صور عن الرحلة

Posted in General | Tagged , , , , , , , , , , , , , , , , , , , , , , , , , , , , , , , , , , , , , , , | Leave a comment

الألوان المحايدة

Posted in General | Leave a comment

الألوان الأساسية

Posted in General | Leave a comment

الألوان الباردة

 

 

Posted in General | Leave a comment

أفكار فنية جميلة عن المنطاد

Posted in General | Leave a comment

فيديوهات عن الالوان الحارة

 

Posted in General | Leave a comment